گرين پاڪستان انيشي ايٽو ملڪ جي لاءِ وڏو سبز انقلاب ثابت ٿيندو، جيڪو پاڪستان جي لاءِ ترقي جون نيون راهون ڳوليندو: وزيراعظم محمد شهباز شريف

اسلام آباد – 10 – جولاءِ (اي پي پي) وزيراعظم محمد شهباز شريف چيو آهي ته گرين پاڪستان انيشي ايٽو ملڪ جي لاءِ ٻيو وڏو سبز انقلاب ثابت ٿيندو جيڪو پاڪستان جي لاءِ ترقي جون نيون راهون ڳوليندو، ان ويزن تحت ايندڙ چار پنج سالن ۾ 30، 40 ارب ڊالر جي متوقع سيڙپڪاري سان گڏوگڏ اٽڪل 40 لک ماڻهن کي روزگار ملندو، حڪومت زراعت جي ترقي ۽ آبادگارن جي خوشحالي جي لاءِ سمورا ضروري قدم کڻي رهي آهي، جديد ٽيڪنالاجي، صحتمند ٻج، سازگار ماحول ۽ خالص زرعي دوائن جي ذريعي زراعت جي شعبي کي ترقي ڏئي نه رڳو زراعت ۾ پاڻڀرائپ حاصل ڪري سگهجي ٿي پر اهو پاڪستان کي دنيا جي نقشي تي ناليواري ملڪ جو مقام ڏياري سگهي ٿي. هو گرين پاڪستان انيشي ايٽو پاڪستان تحت غذائي تحفظ تي منعقد سيمينار کي خطاب ڪري رهيو هو. آرمي چيف جنرل سيد عاصم منير ان سيمينار ۾ اعزازي مهمان طور شرڪت ڪئي. سيمينار ۾ وفاقي وزيرن، سنڌ ۽ پنجاب جي وڏن وزيرن، چئني صوبن جي چيف سيڪريٽريز، زرعي ماهرن، اعليٰ عسڪري آفيسرن ۽ سڄي ملڪ مان آبادگارن جي وڏي انگ کانسواءِ عالمي مهمان، برطانيا، اٽلي، اسپين، چين، بحرين، قطر، سعودي عرب، ترڪيه ۽ ٻين ملڪن سان تعلق رکندڙ سفارتڪارن ۽ سيڙپڪارن پڻ سيمينار ۾ شرڪت ڪئي. وزيراعظم شهباز شريف چيو ته هي روايتي سيمينار نه پر عملي قدم جي لاءِ منعقد ڪيو ويو آهي، اسان کي قوم کي اڳتي وٺي وڃڻو آهي. هن چيو ته اسان تياري ڪري وٺون ته ڪو جبل ۽ سمنڊ اسان جي آڏو رڪاوٽ نه بڻجندو، ان ويزن موجب نار ملڪ به انويسٽمينٽ ڪندا. نار ملڪ پاڪستان ۾ زراعت جي شعبي ۾ سيڙپڪاري ڪرڻ ۾ گهري دلچسپي وٺي رهيا آهن. هن چيو ته پاڪستان وڌيڪ قرض وٺن کي برداشت نه ٿو ڪري سگهي، اسان مشڪل سان قرض ورتا ۽ ملڪ کي ڊيفالٽ مان ڪڍي ورتو. هن چيو ته اڄ اسان کي الله تعاليٰ ٻيهر موقعو ڏنو آهي، اسان سڀ گڏ آهيون، ان وقت تائين ڪير ٻاهرئين سيڙپڪاري نه ٿو ڪري جيستائين ملڪ ۾ استحڪام نه هجي، گڏجي پاڪستان کي ٻيهر پيرن تي بيهاري ٻڌائڻو آهي ته پاڪستان ۾ استحڪام آهي ته سڀ دل کولي سيڙپڪاري ڪندا، ايندڙ چار پنج سالن ۾ 30، 40 ارب ڊالر جي سيڙپڪاري ٿيندي. هن پروگرام سان 40 لک ماڻهن کي روزگار ملندو. هن چيو ته جيڪڏهن اسان ننڍي ۽ وچولي درجي جي صنعتن کي ترقي ڏيون ته اسان کي ان سطح تي به فائدو ٿيندو. هن شرڪت ڪندڙن کي ٻڌايو ته پيرس ۾ منهنجي ملاقات اي ڊي پي جي صدر سان ٿي ته هن اسان جي باسمتي چانورن جي تعريف ڪئي، اسان کي چانور ۽ ٻين جنسن جي روانگي واپار تي ڌيان ڏيڻو پوندو. هن چيو ته ماضي کي خيرآباد چئي همت سان پاڪستان کي وڃايل مقام ڏيارينداسين، گرين پاڪستان انيشي ايٽو گڏيل قومي فرض ۽ ذميواري آهي. هن چيو ته زمين مان سون پيدا ڪندڙ ڀاءُ پاڪستان جي زراعت جيڪا اسان جي معيشت ۾ ڪرنگهي جي هڏي جي حيثيت رکي ٿي جي ترقي جي لاءِ ڏينهن رات محنت ڪن ٿا ۽ غذا فراهم ڪن ٿا، انهن جي ڏينهن رات محنت نه رڳو اڄ تائين پر اڳتي به پاڪستان جي عظيم معمار تصور ٿيندي. وسيلن جي کوٽ مان ڇوٽڪارو، زراعت کي ترقي ڏيڻ جي لاءِ سازگار آبادگارن جو حق آهي ۽ حڪومت جو فرض آهي ته اهي توهان جي لاءِ سمورا وسيلا استعمال ۾ آڻي ته جيئن توهان پنهنجي محنت سان پاڪستان جي اندر زراعت کي ترقي ڏيڻ جي ڪوششن کي الله تعاليٰ جي فضل ۽ ڪرم سان وڌيڪ سگهه ملي. هن چيو ته 75 سالن ۾ ڪيترائي ويزن آيا ۽ ويا آهن وڏي وڏي فزيبلٽي ٺهي پر جيڪو ترقي جو راز جنهن ڳالهه ۾ لڪل آهي، اهو آهي مسلسل عمل، عمل، محنت ۽ محنت آهي، ان کانسواءِ ٻيو ڪو رستو نه آهي، 60ع جي ڏهاڪي ۾ زراعي ترقي سان پاڪستان پاڙيسري ملڪن سميت دنيا جي ڪيترن ئي ملڪن کان اڳتي نڪري ويو هو، اسان جي پيداوار وڌي وئي، ٻج ۾ پاڻڀرائپ حاصل ڪئي، ڊيم ۽ واهه ٺاهيا ويا انهي سان ملڪ جي اندر زرعي انقلاب آيو، تاريخ جي دورن ۾ لاها چاڙها ايندا رهيا، جيڪڏهن آبادگار جي محنت جو ڦل نه ملندو ته اهو آبادگار ڪڻڪ بدران ٻين زرعي جنسن ۾ هليو ويندو. هن چيو ته جيڪڏهن آبادگار کي پنهنجي پيداوار جي قيمت مناسب ملي ٿي ته هو ڪڻڪ، ڪپهه ۽ ٻين جنسن جي پيداوار ۾ ڏينهن رات هڪ ڪري ڇڏيندو. وزيراعظم شهباز شريف چيو ته اسان ڪڻڪ جي امدادي قيمت وڌائي ته گذريل 10 سالن ۾ هن سال سڀ کان وڌيڪ پيداوار ٿي آهي اهڙي طرح ڪپهه جي به رڪارڊ پيداوار ملندي. اهو ڪافي نه آهي جيڪڏهن پاڪستان جي اندر زرعي انقلاب آڻڻو آهي ته ان جي لاءِ صحتمند ٻج، ڀاڻ، زرعي دوائون ضروري آهن، انهن شين جي فراهمي حڪومت جو فرض آهي اڄ جي دور ۾ جديد ٽيڪنالاجي مان به فائدو کڻڻو پوندو. هن چيو ته 1997ع کان 1999ع تائين منهنجي قائد مون کي جيڪا ذميواري ڏني هئي، پنهنجي بهترين ٽيم سان گڏ اسان جعلي دوائن جو مڪمل خاتمو ڪري ڇڏيو هو. وزيراعظم شهباز شريف چيو ته گذريل ڏينهن ريسرچ سينٽر کي جديد رخن تي قائم ڪرڻ بابت اجلاس ٿيو جنهن ۾ ان حوالي سان مختلف تجويزون ڏنيون ويون، منهنجو ان ڳالهه تي زور آهي ته بند پيل ريسرچ ادارا ڪم ڪرڻ شروع ڪري ڇڏين، اهو ئي سڀ کان وڏو نقصان آهي جنهن نه رڳو زراعت پر پوري معاشري کي نقصان پهچايو. هن چيو ته رياست تحت هلندڙ ادارن ۾ 600 ارب خساري ۾ وڃي رهيا آهن، انهن سببن کي ڳولي انهن ادارن کي منافعو ڏيندڙ بڻائڻو پوندو. هن چيو ته اها ڳالهه طئي آهي ته اسان کي گڏجي ان ويزن کي عملي جامعو پارائڻو آهي، پاڪستان حڪومت، صوبائي حڪومتون، لاڳاپيل ادارن ۽ ريسرچ سينٽرز کي گڏجي ان ويزن کي اڳتي کڻي هلڻو پوندو، هاڻي ڳالهين سان نه عمل سان ان ويزن کي اڳتي وٺي وڃڻو آهي. ٻيو زرعي انقلاب رونما ٿيڻ وڃي رهيو آهي، وفاقي، صوبائي حڪومتن ۽ پاڪ فوج جي ڪمٽمنٽ قابل تحسين آهي. هن چيو ته ملڪ جي اندر ساڍا چار ارب ڊالر جو کاڄرو تيل برآمد ڪرڻو پيو، جيڪڏهن اسان کي ان شعبي ۾ به پاڻڀرو ٿيڻو آهي ته اسان کي پنهنجي سامونڊي علائقن ۾ پام ٽري، ڪينولا، سُورج مُکي جي پيداوار وڌائڻي پوندي. هن سمورن ماهرن کي دعوت ڏني ته اچو ۽ اسان جي مدد ڪريو، منهنجو ايمان آهي ته هڪ ٻن سالن ۾ اسان جي زرعي معيشت بحال ٿي ويندي، پوءِ اسان کي ٻاهر وڃي قرض وٺڻا نه پوندا پر هتي سيڙپڪار اچي چوندا ته اسان هتي سيڙپڪاري ڪنداسين، دنيا ۾ اڄ نيشنل سيڪيورٽي جي گهرج آهي ته معاشي سيڪيورٽي کي مضبوط بڻايو. آرمي چيف سيمينار کي پنهنجي خطاب ۾ شرڪت ڪندڙن کي يقين ڏياريو ته پاڪ فوج اسپيشل انويسٽمينٽ ڪائونسل تحت سمورن حڪومتي قدمن جهڙوڪ گرين پاڪستان انيشي ايٽو ۾ پاڪستاني قوم جي امنگن تي پورو لهندي. زرعي، ٽيڪسٽائيل، چمڙي ۽ لائيو اسٽاڪ جي شعبن سان تعلق رکندڙ ماهرن حڪومت ۽ پاڪ فوج جي زراعت جي ترقي تي خاص ڌيان ڏيڻ کي ساراهيو. ماهرن ان حوالي سان جدت، پبلڪ پرائيويٽ پارٽنرشپ ۽ ننڍن آبادگارن تائين معاشي فائدا پهچائڻ جي قدم کي پڻ ساراهيو. شرڪت ڪندڙن ان موضوع تي سيمينار منعقد ڪرڻ کي ساراهيو. شرڪت ڪندڙن چيو ته لينڊ مئنيجمينٽ سسٽم کانپوءِ گرين پاڪستان انيشي ايٽو پاڪستان جي غذائي سلامتي، زرعي مصنوعات جي برآمد ۽ درآمدات ۾ گهٽتائي سان ملڪي معيشت جي لاءِ پنهنجو اهم ڪردار ادا ڪندو. هي سيمينار ملڪ ۾ زراعت ۽ لائيو اسٽاڪ جي شعبي جي ترقي وانگر هڪ مثبت قدم آهي. شرڪت ڪندڙن پاڪستان جي معاشي ترقي جي لاءِ پاڪ فوج جي ان خصوصي شعبي تي ڌيان ڏيڻ کي ساراهيو. بعد ۾ وزيراعظم زراعت ۽ لائيو اسٽاڪ جي نمائش جو پڻ دورو ڪيو.

مضمون کا ماخذ : نتیجہ ڈوپلا سینا

متعلقہ مضامین