وزیراعظم محمد شہباز شریف دا ملائیشیا دے وزیر اعظم نال ٹیلیفونک رابطہ

اسلام آباد۔30نومبر(اے پی پی) وزیراعظم محمد شہبازشریف ملائیشیا دے وزیر اعظم داتو سری انور ابراہیم نال ودھ سارے مینھ تے چھل دی تباہ کاریاں تے پاکستانی حکومت تے عوام دی طرفوں یکجہتی دا اظہار کریندے ہر ممکن تعاون دا یقین ݙیوائے۔ وزیراعظم دفتر دے میڈیا ونگ توں جاری پریس ریلیزموجب وزیراعظم محمد شہباز شریف ملائیشیا دے وزیراعظم نال ٹیلی فون تے رابطہ کیتے ۔وزیراعظم شہباز شریف ملائیشیا دی ٻہوں ساریاں ریاستاں اچ زور دے مینھ پاروں اڄوکی چھل دے نتیجے اچ تھیوݨ آلے جانی تے مالی ضیان تے ملائیشیا دے بھرا عوام سانڳے آپݨی ہمدردی دا اظہار کیتے۔وزیراعظم شہباز شریف ملائیشیا دے وزیر اعظم کوں یقین ݙیوائے جو پاکستان دے عوام اوکھے ویلھے آپݨے ملائیشین بھرا تے بھیݨاں نال کھڑن ۔ وزیراعظم ایں قدرتی آفت نال نبݨݨ دے حوالے نال ملائیشین حکومت دی تکھے تے موثر اقدامات دی تعریف کیتی ۔وزیراعظم ملائیشیا کوں ہرممکن امداد دی پیشکش کیتی تے آپݨے ملائیشیا دے بھیݨ بھراویں سانڳے پاکستان دی حمایت دی علامت دے طور تے وختی انسانی امداد بھیڄݨ دا اعلان کیتا ۔ اڄوکے سال اکتوبر اچ وزیراعظم انور ابراہیم دے دورہ پاکستان دا ذکر کریندے وزیراعظم ݙو پاسے تعلقات دی مثبت رفتار تے اطمینان دا اظہار کیتے اتے سانجھی دلچسپی دے سارے شعبیں اچ ݙو پاسے تعاون مزید تکڑا کرݨ سانڳے پاکستان دا عزم کیتے ۔ انہاں ایں تے اطمینان کیتے جو ملائیشیا دے وزیر اعظم دے دورہ پاکستان دے دوران جنھاں تجارتی مسئلیں دی نشاندہی کیتی ڳئی ہئی انہاں اچ ٻہوں ساریں کوں چنڳے طریقے نال حل کر ڳھدا ڳئے ۔ملائیشیا دے وزیراعظم پاکستان دی حمایت تے وزیراعظم دا شکریہ ادا کیتا تے ایں ڳالھ تے اتفاق کیتے جو ݙوہیں ملکاں کوں سارے اہم شعبیں اچ تعلقات اڳوں ودھاوݨ سانڳے رل تے کم کرݨ دی لوڑھ اے ۔ ݙوہیں رہنماؤاں اعلیٰ سطحی دوریں کوں جاری رکھݨ تے اتفاق کیتے ،وزیراعظم دی سطح دے نال نائب وزیر اعظم و وزیر خارجہ دے آندے سال دے شروع اچ کوالالمپور دا دورہ کرݨ دی توقع اے۔

مضمون کا ماخذ : عمومی کلیدی الفاظ

متعلقہ مضامین